Lu Mizzagnu

Oggi propongo una poesia di Silvestro Ales dedicata al mio paese

Lu Mizzagnu

Nta ‘na vaddata regna malantrinu

Di munti atturniatu pi riparu

Lu “pizzu di Belmonti”, “pitrusinu”,

lu “voscu”, maistusu e minnularu.

Lu “Muntagnoli”, “Santa Caterina”

Muntagni sunnu ca fannu curuna,

Comu doni di curti a la Riggina,

Laudannuni li grazi ad una ad una.

Li so campagni su propriu n’amuri

La “Praca”, lu “Lannaru”, lu “Casali”.

Aria fina rispiri a tutti l’uri,

ristoru e balsamu di li nostri muli.

Stu beddu paiseddu è lu Mizzagnu

Un paiseddu veru armuniusu,

matri natura nun appi sparagnu

criallu veramenti graziusu.

È propriu comu riri maestusu

Cu ‘na gran bedda chiazza e simmetria,

Lattuada ci girau li “Mafiusu”

Petru Germi n’autru film “Gelosia”.

È lu paisi di lu bracciantatu,

cuntati è la genti facultusa,

lu Mizzagnotu è sempri ammintuatu

ca pi travagghiu ‘unn’è razza lagnusa.

Era un paisi prima spiddatizzu,

di chiddi c’un viria mai ristoru,

fra tanti era lu chiù scurdatizzu

campannu sempri a diri aiai e moru.

Ma a picca a picca ha ghiutu stracanciannu,

s’arricamparu luci, acqua e strati

fa meravigghia comu va ngrannennu

cu li so novi e beddi palazzatì!

Pi nui ca ci stamu è un granni vantu

Ed iu cu piaciri vi nni parru,

s’un mi criditi ch’è propriu ‘n incantu

Visitatilu e viriti c’un mi sgarru!